Сирдарёнинг қутлуғ соҳилларидан,
Муқаддас Ганганинг бўйига етди.
Шоҳ Бобур умрининг оҳирларида,
Она диёрини соғиниб кетди...
Бегона юртларда қолган беором,
Улуғ шоир бобом, шаҳаншоҳ бобом.
1494 йил. Темурийлар мулкига қарашли бўлган Фарғона вилоятининг маркази – Ахси шаҳридан чиққан чопар Андижон сари елдек борарди. У Фарғона вилоятининг ҳокими Умаршайх Мирзо саройига шошарди. У машъум хабарни саройга зудлик билан етказиши керак эди...
Тариxда ўзининг тенгсиз жасоратлари билан ном қолдирган буюк давлат арбоби, бутун туркий халқлар мумтоз адабиётига катта ҳисса қўшган нозик дидли ижодкор, Заҳириддин Муҳаммад Бобурнинг таҳликали, бир қадар шарафли, бир мунча изтиробли ҳаёт йўли шу кундан бошланган эди. Тариҳдан маълумки, Темурийзода Умаршайҳ Мирзо Ахси шаҳридаги қалъасида фожиавий ҳалок бўлгач, унинг тахти 12 ёшли ўғли Бобур Мирзога қолади. Шундан сўнг Бобур бир неча бор бобокалони Амир Темур пойтахти Самарқандни қўлга киритди. Лекин, афсуски, ҳар гал шаҳарни узоқ муддат идора қилиш унга насиб этмади. Шуни эътироф этиш жоизки, тарихда ҳеч бир саркарда Бобурчалик тақдир ўйинларига дуч келмаган. 1504 йилда Самарқандни ташлаб чиққан, Андижондан қувилган улуғ шоирнинг кейинги тақдири Ватандан айрилиқда ўтди. Бобур Мирзонинг қизи Гулбаданбегим ўзининг “Ҳумоюннома” асарида хусусан шундай дейди:“… жами 250 га яқин киши, пиёда, елкаларида чопон, оёқларида чориқ… Худога таваккал қилиб Бадаҳшон ва Кобулга йўл олдилар”. 1504 йилда Бобур Кобулга боради ва бу ерда хокимиятни эгаллайди. Шу ўринда қизиқ савол туғилади: Бобур Мовароуннаҳрга қайтиш ниятидамиди?